WAX WADA QABSI AYAYNU HORUMAR KU GAADHI KARNAA

Hadaanu nahay Bulshada Saaxil ee joogta Qurbaha. waxaan aad iyo aad ugu faraxsanahay shebakadan Saaxil Foundation Ururka Horumarinta Saaxil ee marka la soo gaabiyo loo yaqaan (U.H.S) Iyo EmailGroupSaaxil ee lagu Mideynayo Maskaxda Iyo muruqa Dadweynaha Saaxil.

Hadaanu nahay bulshoweynta Saaxil ee joogta wadamadda Qurbaha. waxaanu aad iyo aad ugu faraxsanahay oo muddo badan u hanqaltaagayney sidii aanu u heli lahayn bar ina kulmisa oo aan kaga shaqayno Horumarka Gobolka Saaxil Iyo hareerihiisa. waxaa amaan iyo sharaf mudan dadkii ka soo shaqeeyay ee isku xilqaamay ama isku soo duba riday sidii loogu guulaysanlahaa Barkulankan.

waxa hubaal ah in Bulsho kasta asaaska horumarkeeda uu yahay isxil-qaankeeda, sidaas daradeed hadaanu nahay bulshaweynta Saaxil waxaan hiil iyo hooba la garab taaganahay cid kastoo heegan u ah wax qabadka gobalka.

waxaanu soo dhawaynaynaa in aan ku guulaysan doono halganka dheer ee loo mari doono horumarka gobalka kaasi oo aanu ciwaan ama title uga dhignay "Wax wada qabsi ayaynu horumar ku gaadhi karnnaa" Sidaasi daraadeed hadaanu ka midnahay qurba-jooga gobalka waxaanu soo jeedinaynaa qodobadan hoos ku qoran.

1- In ay dhamaan Aqoonyahanada, Waxgaradka, Gancastada, Ururada bulshada (local Oragnizations) iyo Madaxdhaqameedka Gobalka Saaxil IWM ay si wada jira noogula guntadaan wax qabadka iyo horumarka gobalka.

2- In la helo Umbrella ama Frame-work ay ku wada midoobaan dhamaan cid kasta oo danaynaysa wax qabadka gobalka.

3- In si degdeg ah loo helo xog buuxda oo ku saabsan baahida dhabta ah ama (Actual demands) ee ka jirta gobalka Iyo Hareerihiisa.ha noqoto mid waxbarasho, ama mid caafimaad, ama adeega bulshadaba si looga wada tashado qaabkii wax looga qaban lahaa.

4- In mudanaanta la siiyo hadba baahida weyn ee u baahan in wax laga qabto ha noqoto dhinac waxbarasho, Caafimaad ama dhinacyada kale adeega bulshada IWM.

5- In la mideeyo waxqabadka gobolka si wada jirana looga wada qayb qaato si loo gaadho midho wax ku ool ah.

6- In la helo xidhiidh wada shaqayn joogta ah kaasi oo ka dhaxeeya qurba jooga iyo kuwa dalka jooga ama qurba jooga dhexdoodaba si loo wada gaadho aayaha Mustaqbalka Gobalka Saaxil.

7- In sida ugu dhakhsaha badan looga hawl galo Wax-qabadka Gobolka.

Ugu danbayntii waxaan mahadnaq badan u soo jeedinaynaa Cid kasta oo ka qeyb qaadatay dhismaha Shebakadan xidhiidhinaysa Reer Saaxil Waxa kaloo iyana mahadnaq u soo jeedinaynaa ururaddii hore ee samafalka ka waday Gobolka waxaananu leenahay dadaalka halkaasi ka wada anaguna waxaanu nahay garab idiin soo kordhay mar kastana garabkiina ayaanu taaganahay oo waxaan wada leenahay hadaf iyo ujeedo isku mida oo ku saabsan Horumarka Gobolkeena.

Waxa iyaguna Amaan iyo sharaf mudan Waxgaradka Saaxil iyo dhamaan Jaaliyadaha Yurub iyo Waqooyiga America. waxaananu leenahay"Gobalka Cidna uma maqna Ceelna uma qodna"

Gabagabtii Qoraalkani waxaanu ka codsanaynaa cid kasta oo danaynaysa hormarka Gobalka in ay Rayigooda iyo wixii fikirkooda ah ee ku saabsan horumarka Gobalka nagala soo xidhiidhaan.  Saaxil Foundation / Ururka Horumarinta Saaxil (U.H.S).